أحلى حاجة ف الدنيا ان الواحد يكون مبسوط
فرحان
الفرحة اللي من القلب دي
ولو ان الحزن ليه مذاق خاص
وساعات الناس بتستمتع بشئ ما فيه
ايه هو معرفوش "بس انا ساعات بكون منهم :D "
ولو ان بردو الحزن ظاهرة صحية جدا لما يكون فيه شئ يستحق وجوده
لأن مينفعش ف الحالة دي اني اشوشر عليه أو اكتمه جوايا
وأى حاجة غيره ف الوقت دة هتكون مش ف مكانها
لكن بالرغم من كل دة
الفرحة أحلى
ما أكيد .. ماجبتش انا الديب من ديله يعني :D
بس المشكلة بئا والى انا بقيت ملاحظاه أوي دلوقتى اننا بنتلكك للفرحة
أو لما بتيجي مش بنعرف نعيشها .. مش بنصطادها
مش بنديها حقها ووقتها وناخد حقنا منها
بالعكس بقينا ف سلام نفسي مع النكد
أه بجد
بيقولو ان احنا شعب ابن نكتة
فعلا .. وجداً اوى كمان
بس بردو شعب يعشق النكد :D
وشايل في قلبه شوية وشويات :D
بقى كل واحد شايف حياته مجموعة من الهموم وبس
الى بيدرس قرفان
والى بيشتغل طهقان
ولو طلع ع المعاش حتى هيحس ان خلاص حياته خلصت كدة
الى لسة ربنا مرزقهوش بشريك حياته بينعي حظه دائما وابدا
والى اتخطبت بتفرح يومين بجد وبعد كدة يسيطر عليها الهم والربكة
وكأنها مش ف مرحلة حلوة ف حياتها وداخلة على مرحلة أحلى
والى بيتجوز بيحس ان خلاص راحت عليه
والى بتجيب بيبي بتحس انها عجزت وخلاص ودعت فترة شبابها
و و و
اه والله بنتلكك للفرحة
طب ليه كل حاجة بندور ع الوحش فيها ونركز عليه !!
بالمزاج أو لا إراديا
ليه بنضحك كتيييير أوي بس من برة .. وسايبين جوانا كدة !!
ليه بنسيب الحاجة الحلوة جت جت مجتش ادينا عايشين
وبنعتبر ان الأسى دة هو الأساس وأى حاجة تانية مجرد طارئ هيجي ويعدي وترجع ريما لعادتها
ليه منتحايلش على إحساس الفرحة دة أو راحة البال ؟
مفهاش حاجة لما ابقى مخنوقة شوية واشوف طفل صغير ادامي اغصب على نفسي واضحكله
مش عايزة أضحك ومش حسة الضحكة دي .. بس هضحك
يشوفنى هو يقوم مبتسم
فاضحكله تانى
بس المرة دي طلعت بجد ولوحدها
.. من قلبي
مفهاش حاجة لما ربنا يبعتلى ساعتها اى حد بحبه في مكالمة تليفون مثلا واخرج شوية من المود دة فبدل ما أقول
" بضحك وانا جوايا بركان :( "
أقول " ربنا بعتلى الشخص دة علشان يفرج عن همي شوية .. الحمد لله"
مفهاش حاجة لما أفضل ورا نفسي لحد ما اقنعني ان كل الى بيحصل دة ربنا كتبهولي
أو ان مش لازم كل الى نفسي فيه يتحقق
أو انى لازم أحاول .. امال انا عايشة ليه
أو هصبر واكيد بكرة ان شاء الله هيبئا احسن
اتحايل على نفسي
أهو
ع الأقل ارتاح من جوايا نسبيا حتى لو متحلتش الأزمة
دي مش حلول سحرية
ولا انا من النوع المتفائل زيادة عن اللزوم وشايفة الدنيا وردية
هي غامقة
وغامقة اوى :D
بس مش ناقصة نغمقها زيادة
اهى محاولة وان فشلت
يبئا خلاص ..
طب بلاش الواحد يتحايل ع الفرحة :D
على راحة البال بس
وبلاش يتحايل عليها هي كمان
بس لو جت .. ميتلككلهاش !
