Monday, June 22, 2009

كلام .. لسة نفسي أقوله



ساعة ما شوفت واحد فرمل فجأة في وسط الشارع
فكرت قبل ما تقول عليه غشيم ومبيفهمش انه ممكن يكون ظهر قدامه فجأة قطة صغيرة ؟

قبل ما تحكم على أصحابك انهم بقو ناس لا تطاق وبئا لهم حوارات جانبية كتير
فكرت انهم ممكن يكونوا بيخططوا علشان يعملولك يوم عيد ميلادك حاجة محصلتش !

قبل ما تحكم على واحد كل مشاركاته على النت مجرد تهييس انه شخص تافه
فكرت ان ممكن يكون الوقت الوحيد اللي بيضحك فيه ف يومه كله هو الوقت دة ؟

قبل ما تبئا حلقة في سلسلة نقل خبر سئ عن شخص تعرفه أو متعرفوش
فكرت انه ممكن يكون مجرد إشاعة من تأليف وإخراج شخص هوايته أذية الناس ؟

لما شوفت واحد متهم في قضية لم تثبت ادانته بعد ،أو كبش فدا لخبر مطرقع في جرنال
فكرت قبل ما تغلط فيه أو تدعي عليه انك ممكن تكون مكانه .. وتكون برئ !!!

قبل ما تبئا فكرتك عن ناس ان تصرفاتهم مجرد فزلكة أو منظرة على خلق الله
فكرت ان ممكن يكونوا هما اصلا كدة .. هي دي حياتهم .. هي دي اهتمامتهم

قبل ما تحكم على شخص بإنه سئ من موقف حكهولك حد عليه وحصل بينهم
فكرت تسمع منه هو كمان ؟

قبل ما تحكم على حد إنه بعد عن ربنا
فكرت تسأل نفسك هو مين أصلا اللي يقدر يعرف حقيقة علاقتك انت بربنا ؟!

___

طب فكرت ف يوم تقول لنفسك " ماتخليك ف حالك ياأخي "


فكرت تقدم حسن الظن الأول بس بجد .. مش بالكلام

فكرت تدع الخلق للخالق زي ما بنقول علطول كدة

فكرت تشغل نفسك بعيوبك قبل ما تعيّن نفسك حَكم على الناس
.. زي ما بنقول علطول بردو

للأسف كتير بنقول بس

__

على فكرة !!!

يمكن هيتقال عليك ساذج

ومش بعيد تلاقي حد بيضحك عليك لحد ما راسه تخبط في الأرض وهو بيقولك
" ياخبر أبييييييض..دة انت على نياتك أوي يابني "

بس الأكيد إنك مش هتحس بتأنيب الضمير يوم ما تعرف إنك قلت كلمة لم تلق لها بالا وظلمت بها إنسان

الأكيد إنك لما تقرأ في سورة الحجرات

(( يَا أَيُّهَا الَّذِينَ آمَنُوا
إِن جَاءكُمْ فَاسِقٌ بِنَبَأٍ فَتَبَيَّنُوا أَن تُصِيبُوا قَوْمًا
بِجَهَالَةٍ فَتُصْبِحُوا عَلَى مَا فَعَلْتُمْ نَادِمِينَ ))
و

(( يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ إِنَّ بَعْضَ الظَّنِّ إِثْمٌ ))

هتحس إنك مرتاح .. وإن دة الطبيعي والمفروض

***
لو مكنتش فكرت ف كل دة قبل كدة

من فضلك .. جرب تفكر !!

___

يمكن الكلام دة أنا كتبته زمان .. مش جديد

بس في أوقات بتحصل مواقف من قريب أو من بعيد .. بتوجع بجد

ببقى نفسي أقول لكل الناس -ولنفسي قبلهم- الكلام دة !

من فضلك .. من فضلك .. أرجوك

جرب تفكر

Saturday, June 13, 2009

بين أمسي .. وغدي





لمنزلنا شرفتان .. إحداهما تطل على شارع واسع، أقرب بناية تقابلها
هي على بعد مائة متر تقريبا

نسيمها البارد يجعلها ملاذنا في ليالي الصيف الحارة

أما الأخرى، مطلة على شارع جانبي، لذا قليلا ما أزورها،
ونادرا ما أدقق النظر في ما ومن حولها

من تلك الشرفة .. يمر العمـر

منذ ثمان سنوات تقريبا كنت أرى فتاة في شرفة مقابلة، وأرى شابا في أخرى تعلوها

في المرة التالية، جمعتهما نفس الشرفة .. العلوية بالطبع

والتالية، ظهر وجه جديد .. صغير

ثم صار الصغير هو الأكبر .. ثم صار الاصغر هو الأوسط

في كل مرة يصيبني الذهول والتعجب وكأنها الأولى .. أسأل
أمي، تضحك " دة من زمان يابنتي "

لمَ تمر الأيام بسرعة ؟! .. متى مرت !!

* * *
كان بالأمس غدا ... وسيصير أمسا، غدا

عجيب أمره !

أنتظره أحيانا وكلي لهفة، أتمنى لو أجتذبته قبل الأوان بأوان. أحيانا أخرى أرقبه في وجل يقترب، لو يبطئ خطاه نحوي قليلا !! . ومع هذ أو ذاك، لا يلبث يأتي حتى يسقط من الحسابات.

مظلوم ؟

البعض يعيشون على ما كان، تشدهم الدنيا للأمام عنوة فيمضوا مضطرين ورؤوسهم مشدودة إلى الوراء .. إلى ما مضى من ذكرى، أو مكتفية بما مضى من حزن

والبعض تمضي أيامهم غير آبهين، على أطراف أصابعهم يقفزون لأعلى آملين أن تلتقط أعينهم مشهدا من حلم يتحقق، دون أن يقدموا له شيئا

قليلون هم من يدركون أن الذكرى لا تكون إلا إذا انفصلت عن الحاضر .. والحلم لا يتحقق إلا إذا مر اليوم يحمل إنجازا

* * *
أمسي لن يعد .. وغدي لن يأت، حتى يأت

كطبق يحوى أكلتي المفضلة، أتمنى، أتمنى أن يكون يومي

هذا وقته ولن يطول، لا أتركه إلا وقد أنهيته عن آخره .

على مهل استمتع بكل جزء فيه
لحظة .. لحظة، قضمة .. قضمة

وعندما أزور شرفتنا المرة التالية، لا يهيبني مرور العمر، لا يصيبني الذهول.
أملا ذاك الفراغ بمئات الأيام .. التي أعرفها.

_________________________

شكرا لمن ألهماني تلك الكلمات فجعلاها
تطغى على تفكيري